Wednesday, 27 May 2015

காசு வெறி பிடித்த கிழவர்!

இளையராஜாவின் காசு வெறி!



இரண்டு நாட்களுக்கு முன் திரு. கார்க்கிபாவா (@iamkarki) ஒரு அழகான பதிவை எழுதியிருந்தார். Love you Raja என்று ஆரம்பித்து, Hate you Raja என்று முடித்திருந்தார்!
அது  முழுக்க அவர் விருப்பம்! ஆனால், அதற்கு அவர் சுட்டியிருந்த காரணங்கள் கொஞ்சம் வித்தியாசமானவை.

ஆரம்பிக்கும்போதே, சாதுர்யமாக இளையராஜா சமீபகாலமாக இசையமைத்த "தமிழ்படங்கள்" தோல்விப்படங்கள் என்று நிறுவியிருந்தார் சென்ற ஆண்டின் அத்தனை வெள்ளிவிழாப் படங்களுக்கு இடையே திருஷ்டிப் பரிகாரமாக இவை இருந்துவிட்டுப் போகட்டுமே!
அதன்பின் இளையராஜாவின் அறிக்கை ஒன்றை இணைத்துள்ளார்!



அதற்கு அவர் தரும் விளக்கம்- அவர் வார்த்தைகளில்!

அதாவது இனிமேல் பேருந்துகளில் ராஜா பாடல்கள் போட கூடாது. டீக்கடைகளில் போட கூடாது. கல்யாணம், காது குத்து ஏன் பப் டிஸ்கோதே வரை எங்கேயும் போடக்கூடாது. எங்கெல்லாம் ராஜா பாடல்கள் கேட்டு நம் பால்யத்தை மீட்டெடுத்தோமோ, அங்கெல்லாம் ஒலிக்க கூடாது. ஏனெனில் அவை சட்டப்படி தவறு. ராஜாவின் 9000 பாடல்களையும் எம்பி3 வடிவில் தரவிறக்க கூடாது. எல்லாவற்றையும் முறையான சிடிக்களாக ராஜாவே வெளியிடுவார். அதில் மட்டுமே கேட்கவும். இதுதான் விஷயம்.

எவ்வளவு நேர்மையான விளக்கம்!  
விசிடி யில் படம் பார்க்காதேகாசு கொடுத்து தியேட்டரில் பார் என்பதை, இனி படமே பார்க்கக் கூடாது என்று தடைபோடுவதாக அர்த்தப்படுத்திக்கொள்வார்போலும். 

பார்த்தால் திருட்டுத் தனமாகத்தான் பார்ப்பேன் காசுகொடுத்துப்பார்க்கவே மாட்டேன் என்று ஒரு படைப்பாளியாக அவர் சொல்கிறாரா?

அந்த அறிக்கை இனி என் பாடல்களை யாரும் ஒலி/ஒளிபரப்பக்கூடாது என்று சொல்வதாக என் எளிய புரிதலுக்கு எட்டவில்லை!

நேற்று வரை சட்டத்தை மறந்து எல்லா அரசியல், பொது விஷயங்களை அறம்/தர்மம் சார்ந்து அலசிய ராஜா ரசிக நண்பர்கள் திடிரென சட்ட வல்லுநர்கள் ஆகிவிட்டனர். ராஜா கேட்பது சரிதானே என்கிறார்கள். நீங்கள் வைத்திருக்கும் சவுண்ட்கிளவுட் லிஸ்ட் கூட தவறு டோழர் என்றால் அழித்துவிடுவேன் என்கிறார்கள். எல்லா பாடல்களையும் இனி ஐட்யூன்ஸ் வழி முறைப்படி காசு கட்டி வாங்குவார்களாம். நான் இதுவரை பழகிய எல்லா ராஜா ரசிகர்களும் திருட்டு MP3க்களில்தான் ரசிக்கிறார்கள். அப்போதெல்லாம் யாருக்குமே உறைக்கவில்லை. சட்டப்படி என்றால் ஜெயா தீர்ப்பு கூடத்தான் சட்டப்படி சரி. அப்படியா இத்தனை நாள் பேசினார்கள்? அதெல்லாம் தெரியாது. ராஜா சொல்லிவிட்டார்.

இந்தப்புலம்பல் இதுகுறித்து என்பது வெட்டவெளிச்சம்! 
இத்தனை நாள் நான் திருட்டுத்தனமாகத்தானே அனுபவித்துக்கொண்டிருந்தேன். இப்போது வந்து காசு கேட்கிறாயே - உன் ரசிகர்களும் கூச்சமில்லாமல் அதை ஆமோதிக்கிறார்களே - இதுதானே  இதன் அர்த்தம்?
இங்கே எதற்கு ஜெயலலிதா வந்தார்திசை திருப்பவா?


ரேடியோ மிர்ச்சியில் ஒரு நிகழ்ச்சி. எல்லாமே ராஜா பாடல்கள். அந்த பாடல்களை ஒலிபரப்ப காசு கொடுக்கிறது மிர்ச்சி. தலைப்பு நீங்க..நான்..ராஜா சார்”. இந்த தலைப்பில் வரும் ராஜா சாருக்கு என தனியாக பணம் கொடுக்க வேண்டுமாம்? கேட்டால், அந்த தலைப்பை வைத்து காசு சம்பாதிக்கிறதாம் மிர்ச்சி.

அதில் நீங்க, நான் இரண்டும் பிராண்டா அல்லது ராஜாசார் என்பது பிராண்டா
அந்தத் தலைப்பு வைக்க என்னிடம் முறையான அனுமதி கேள் என்று சொல்வது தவறா? நாளை நான் கார்க்கிபாவா என்று தலைப்பிட்டு எழுதினால் இவர் கேட்கமாட்டாரா?

நாற்பது  வருடமாக சமூகத்துக்கு உழைத்தார் என்று யார் சொன்னார்கள் என்று தெரியவில்லை! அப்படிச் சொல்லியிருந்தால் அது அவர் இசை பற்றித்தான் இருக்கமுடியும் என்று குழந்தைகூடச் சொல்லும். இளையராஜா ரோடு போட்டார். மரம் நட்டார் என்று யாரும் சொல்லவில்லை! நண்பருக்கு வேறு ஏதோ குழப்பம்!
அது இப்படி வெடிக்கிறது!

யார் சமூகத்திற்கு உழைத்தவர்? தானொரு தலித் என்ற அடையாளத்தை மறைக்க என்னவெல்லாம் செய்ய முடியுமோ அதை தொடர்ந்து செய்து வரும் ராஜா சமூக சேவகரா? போற்றி பாடடி பெண்ணே.. தேவர் காலடி மண்ணேஎன லஜ்ஜையின்றி தன் பாட்டனும், பூட்டனும் பட்ட அவஸ்தை மறந்து இசையமைத்த ராஜா சமூக சேவகரா? ராஜா மகா கலைஞன். யுக புருஷன். சரிதான். சமூக சேவகர் என்றால் அவ்வளவுதான்.

ராஜா தான் ஒரு தலித் என்று கழுத்தில் கட்டிக்கொண்டு அலையவேண்டும் என்று நண்பர் விரும்புகிறாரா?  
சாதி அடையாளம் தொலைக்க எல்லோரும் போராடும் காலகட்டத்தில் ஒருவர் எந்நேரமும் தன்னை ஒரு தலித் என்று அடையாளப்படுத்திக்கொண்டே இருக்க நிர்பந்திப்பது  என்ன ஒரு மனநோய்க் கூறு?

இளவயதில் சாதி அடையாளத்தால் அவமானப்பட்ட எந்த சராசரி மனிதனும், வளர்ந்து வசதி வாய்ப்பை அடைந்தவுடன் அதை மறைக்கவும், மறுக்கவும்தானே விரும்புவர்?
இட ஒதுக்கீட்டில் மாவட்ட ஆட்சியாளர் , மருத்துவரானவரை ஜாதி கேட்பாரா இவர்?

இளையராஜா தன் ஜாதியைப் பயன்படுத்தியா உயர்ந்தார்?

தொட்டம்பட்டியிலிருந்து துபாய் போனவன், வந்த வேகத்தில், டாய்லெட் போக டிஸ்யூ பேப்பர் கேட்கிறான், இந்தியா சுத்தமில்லாத தேசம் என்று முகம் சுளிக்கிறான்.

இதில் இளையராஜாவை இவரே சமூக சேவகர் என்று உருவகப் படுத்துவதாகப் புனைந்துகொண்டு, வசதியாகத் தாக்குகிறார்! 

இவர் பிரச்னை ராயல்டி அல்ல. வேறு ஏதோ எதிர்பார்ப்பு நிறைவேறாத ஆதங்கம் இப்படி வெடிக்கிறது! தேவர் மகன் நேற்று வந்த படமல்ல!
Love you Raja என்று T ஷர்ட் மாட்டிக்கொண்டு கோடம்பாக்கத்தில் குறுக்கும் நெடுக்கும் அலைந்த  நோக்கம் நிறைவேறாத எரிச்சலோ?

பாப் மார்லியோட ஒப்பிடுகிறார்கள். கோடிக்கணக்கில் கொட்டி கொடுத்த சோனி நிறுவனத்தை போடா என சொல்லிவிட்டு தன் பாடல்களை எல்லோருக்குமென அறிவித்த அவன் எங்கே? இந்த வயதிலும் காசு தேடும் இவர் எங்கே? கலையை ரசிப்பதற்கும், கலைஞனை ரசிப்பதற்கும் எங்களுக்கு பாடம் எடுக்காதீர்கள்.

இது அடுத்த வயற்றெரிச்சல்! பாப் மார்லியோடு யாரும் ஒப்பிடவில்லை! இவரே ராஜாவை ஒப்பிட்டு பாப் மார்லியை கடவுளாக வியக்கிறார்!

இன்று வரை பாப் மார்லியின் ராயல்டி வழக்குகள் தீர்ந்த பாடில்லை.

இறந்த போது (1981) பாப் மார்லியின் சொத்து மதிப்பு 30 மில்லியன் டாலர்கள். ராயல்டி மூலம் ஈட்டியதுதான். அவர் வலம் வந்து கொண்டிருந்தது பி.எம்.டபுள்யூ காரில். அதுவும் ராயல்டியில் சம்பாரித்ததுதான். இறந்த பிறகு அவரது, எஸ்டேட் என்றழைக்கப்படும் குடும்பத்துக்கு (மனைவி ரீட்டா மார்லி, அவர்களது 4 குழந்தைகள். பிற 7 பெண்கள் மூலமாக பிறந்த 7 குழந்தைகள்) கிடைத்துக்கொண்டிருந்த ராயல்டி வருடத்துக்கு 2.5 மில்லியன் டாலர்கள்.
மார்லி ராயல்டி வேண்டாமென்றெல்லாம் சொல்லவில்லை. யாருக்கு ராயல்டி செல்ல வேண்டும் என்று தெளிவாக சொல்லவில்லை அவ்வளவுதான்.
கெய்மன் ரெகார்ட்சிடமிருந்து அவ்வளவு எளிதில் காசு பெயராது. அதுவரையுமே சரியாக ராயல்டி தரவில்லை. அதனால் இந்த பாடலுக்கு இசையமைத்தவர் என்று சூப் கடை வைத்திருந்த தன் நண்பர் வின்சண்ட் ஃபோர்ட் பெயரை போட்டுக் கொண்டார். அதனால் அந்த பாடலின் காப்புரிமை, ஒப்பந்தப்படி ஐலண்ட் ரெகார்டிங்குக்கு சென்று விட்டது. ஐலண்ட் ரெகார்ட்சிடமிருந்து பலவருடங்களாக வந்த கொண்டிருக்கும் ராயல்டி காசில்தான் நண்பரின் சூப் கடை பிழைத்தது. பாடலின் முழு உரிமை கெய்மனுக்கா ஐலண்டுக்கா என்கிற வழக்கு சென்ற வருடம் வரை இருந்தது. இன்று மார்லியின் புகைப்படங்கள் வரை காப்புரிமைக்குட்பட்டது. மார்லி பிராண்ட் கஞ்சாவே இருக்கிறது

இதை இன்னொரு நண்பர் சுட்டியவுடன், இவ்வளவு கேவலமானவருடனா இளையராஜாவை ஒப்பிட்டீர்கள் என்று அப்படியே நிறம் மாறுகிறார். எனில், பாப் மார்லே பற்றி இவர் தெரியாமலே அள்ளிவிட்டிருக்கிறார்! நோக்கம் எப்படியாவது ராஜாவை யாருடனாவது ஒப்பிட்டு சிறுமைப்படுத்துவது.

இத்தனை வயதில் காசுக்கு அலைகிறார் என்பது அடுத்த குற்றச்சாட்டு! 

யார் காசுக்கு யார் அலைகிறார்கள்? அவர் உழைப்பை விற்று ஊரில் உள்ளவன் எல்லாம் காசு பார்ப்பான், அதில் அவருக்கு உள்ள உரிமையைக் கேட்டால் காசுக்கு அலைபவர்! 
மற்ற இசையமைப்பாளர்கள் இலவசமாக இசை அமைக்கிறார்களா? உன் உழைப்புக்கு நான் உரிமை கொண்டாடினால் காசுக்கு அலைபவன். இவர்கள் எல்லாம் ஊருக்கு உழைத்துக்கொடுத்து, காற்றை உண்டு வாழ்கிறார்கள் போலும்!

ராஜாவை தமிழினம் ஓர் அடையாளமாக பார்க்கிறது. இந்த சூழலில் அவர் படைப்புகள் நாட்டுமையாக்கப்பட வேண்டும்.குறைந்தபட்சம் தங்குதடையின்றி எல்லோருக்கும் சென்று சேரும் வகையில் இருக்க வேண்டும். ராஜா படம் போட்ட டீஷர்ட் நிறுவனம் கூட அவருக்கு பணம் தர வேண்டுமென்றால், டீ ஷர்ட்டே கிடைக்காமல் தான் போகும். 30 வயது இளைஞன் ஈகோவோட அலைவதை ரசிக்கலாம். 75 வயதில் ஈகோ, கர்வமும், அகந்தையும் சகிக்கவில்லை.ஒவ்வொரு மேடைப்பேச்சிலும் ராஜா வெறுப்பைதான் சம்பாதிக்கிறார். இவருக்கு ஆன்மீக ஞானம் எல்லாம் வாய்ப்பே இல்லை என ரமணர் எப்போது சொல்லியிருப்பார் என நம்புகிறேன். இத்தனை மோசமான ஒரு மகா கலைஞனை பற்றி நான் படித்ததே இல்லை.

இத்தனை மோசமானவரைத்தான் லவ் யூ என்று பனியனில் எழுதிக்கொண்டு அலைந்தார் நண்பர் - அவர் உழைப்புக்குக் காசு கேட்கும்வரை!
அதுவரை அவர் ஒரு ஆன்மீகவாதி!

தன் மனசாட்சிக்கு மாறுபடாமல், வந்த வாய்ப்புகளை (பாலச்சந்தர், ரஜினி உட்பட) உதறித் தள்ளிவிட்டு, அதன் விளைவுகளை யாரிடமும் போய் பல்லிளித்துக் கெஞ்சாமல் ஏற்றுக்கொண்ட வித்தை கர்வம் இன்றைக்கு தலைகனமாகப் பார்க்கப்பட்டால், பார்க்கும் கண்ணில்தான் கோளாறு!

யாரிடமும் வாய்ப்புக்குக் கெஞ்சாமல், போலிப் பணிவு காட்டாமல், தலை நிமிர்ந்து நிற்பவனுக்கு காசு வெறி என்று தூற்றுபவர்களின் உளப்பாங்கு தீவிர பரிசோதனைக்கு உட்பட்டது.

அவர் பிராண்டை வியாபாரம் செய்து காசு பார்க்க நினைக்கும் அந்த கும்பல் அவரது மகளும், மகனும் என்றால், அந்த உரிமை உங்கள் எல்லோரையும் விட அவர்களுக்கு உண்டு

இந்த நாட்டுடைமை விஷயத்தை இளையராஜா பாடல்களைப் பண்ணுவதைவிட, ராமசாமி நாயக்கரின் கருத்துக்களை அழுத்தி வைத்து உட்கார்ந்து நோகாமல் காசு பார்க்கும் வீரமணியாரிடமிருந்து ஆரம்பியுங்கள். அதுதான் நாட்டுக்கும், நாட்டு மக்களுக்கும் தேவை.

இந்த பேராசை பிடித்த திமிர்பிடித்த தலித் கிழவனின் உழைப்பில் குளிர் காயாதீர்கள்! 
அதை அவரது குழந்தைகளுக்கு அவர் கொடுப்பதைக் கேட்கும் உரிமை உங்களுக்கு இல்லை!

நேர்மையான ரசிகனை மாபியா, பஜனை கோஷ்டி என்பதை விட்டு, உங்கள் விமர்சனத்தின் உண்மையான நிறத்தை ஆராயுங்கள்!

முடிந்தால் கொஞ்சநேரம் ராஜா பாட்டுக் கேளுங்கள். மனம் ஒரு நிலைப்பட்டு சாந்தமாகும்!

அதைவிட்டு, போலிப் புகைப்படங்களை வெளியிட்டு , உங்கள் அசிங்கமான மனநிலைகளை வெளிச்சப் படுத்தாதீர்கள்!





இந்தப் பதிவுக்கு சம்பந்தப்படாத ஒரு பழைய விஷயம்.

காலை 10 மணி!

ஹல்லோ, இளையராஜா இருக்காருங்களா?
இல்லைங்க சார் அவர் ரெக்கார்டிங் போயிருக்கிறார்.
எப்போ வருவார்?
ஒரு எட்டு மணிக்கு மேல் ட்ரை பண்ணுங்க!
நீங்க யாரு? அவர்கிட்ட ஏதாவது சொல்லணுமா?
இல்லை நான் அவர் கிட்டயே பேசிக்கிறேன். (ரத்தம் இன்னும் கொஞ்சம் இளமையாக இருந்த திமிர்)

இரவு 9 மணி!

ஹல்லோ, ராஜாசார் இருக்காரா?
சொல்லுங்க நான் ராஜாதான் பேசறேன்.
ஐயா, எங்க இசைப்பள்ளி மாணவர்கள் பாடி ஒரு சி டி வெளியிடணும், நீங்க வரமுடியுமா?
மன்னிச்சுக்குங்க தம்பி, நான் வெளி ப்ரோக்ராம் எதுவும் ஒத்துக்கறதில்லை. பிள்ளைகளுக்கு என் ஆசிகளைச் சொல்லுங்க.
வேற ஏதாவது உதவி வேணுமா தம்பி!
இல்லைங்க ரொம்ப நன்றி!

இது அந்த ஈகோ பிடித்த கிழவனுக்கும் எனக்குமான உரையாடல்!

இந்த ப்ரொக்ராமுக்கு ஒரு பணிவு இசையை அழைக்க, பீ ஏவை தாண்டி பேசமுடியவில்லை!
வர இசைந்த ஜேசுதாஸ் கேட்டது அதிகமில்லை- ஒரு லட்சம் + செலவுகள்!
இது சும்மா தகவலுக்காக!





Monday, 18 May 2015

குற்ற உணர்ச்சியின் உந்துதலில் எழுதிய பதிவு!





ஒரு சமுதாயக் குற்றம் செய்ததுபோல் உள்ளுக்குள் உறுத்திக்கொண்டே இருக்கும் உணர்ச்சியின் வெளிப்பாடே இந்தப்பகிர்வு.

அதற்குமுன்,
நான் கேள்விப்பட்ட ஒரு வியாபார விளம்பரத்தை உங்களோடு பகிர்ந்துகொள்ள விருப்பம்.

தமிழக வரைபடத்தில்  ஒரு சின்ன குண்டூசி முனையளவே உள்ள ஒரு சிற்றூர் குளித்தலை. அங்கே, ஒரு விளம்பரம்! 

"எங்களிடம் ஐந்து லட்ச ரூபாய் டெபாசிட் செய்தால், ஐந்து வருடங்களில் அந்தப்பணம் ஆறு இலட்சமாகத் திருப்பித்தரப்படும். மேலும் டெபாசிட் செய்தவுடன் ஒரு பிளாட் உங்கள் பெயரில் பதிவு செய்து கொடுக்கப்படும்."

இது என்ன விளம்பரமாக இருக்க முடியும் என்று யூகிக்க முடிகிறதா?
ஆரம்பித்து இரண்டே வருடங்கள் ஆன ஒரு கல்வி வியாபார நிறுவனத்தின் விளம்பரமே அது.

KG முடித்த குழந்தைகளுக்கு தலா 500 ரூபாய் வசூல் செய்து, பட்டமளிப்பு விழா நடத்திய கையோடு, முதலாம் வகுப்பில் சேரும் மாணவர்களிடமிருந்து வசூல் அறுவடைக்கு அந்த விளம்பரம்.

முதல் வகுப்பில் மட்டும் ஆறு பிரிவுகள், தலா ஐம்பது மாணவர்கள்.
அதிகமில்லை நண்பர்களே, வசூல் இலக்கு, முதல் வகுப்பு மாணவர்களிடமிருந்து மட்டும் பதினைந்து கோடி ருபாய்.

இலக்கின் பெரும்பகுதி அடைந்துவிட்டதாகத் தகவல்!

அப்பட்டமாய், வியாபாரமாகவே ஆக்கப்பட்டுவிட்ட நம் கல்வி, ரியல் எஸ்டேட் வரை உள்ளே இழுக்க ஆரம்பித்துவிட்டது.

இன்றைக்கு, ஒரு LKG சேர்க்கைக்கு ஒரு லட்சம் நன்கொடை என்பது மிகக் குறைந்த தொகை.

அதற்குமேல், அந்தப்பள்ளி அளிக்கும் ஏசி போன்ற ஆடம்பரங்களுக்கு ஏற்றவாறு தொகை மாறுபடும்.
இது இன்றைய தமிழ்நாட்டு நிலை.

ஆறாம் வகுப்பு முடித்த என் மகனுக்குப் போனவருட கல்வி, இன்னபிற கட்டணங்கள் ஈரோடு போன்ற சிறு நகரத்தில் ஒன்றேகால் லட்சத்துக்கு மேல்!

இதில் எனக்கு கிடைத்த சில அனுகூலங்கள்??!

1. அந்த வகைப் பள்ளிகளில், அதுதான், குறைந்த கட்டணம் உள்ள பள்ளி.
2. என் மகன், பள்ளி செல்லும் வாகனத்திலிருந்து, படிக்கும் வகுப்புவரை ஏசியில் இருந்துவிட்டு, இயற்கை சீதோஷ்ணத்தை எதிர்கொள்ளச் சினுங்குகிறான்.
3. பள்ளியில் கட்டாயமாக்கப்பட்ட மதிய உணவை சாப்பிட்டு, ஒரு வருடத்தில் நான்கு கிலோ எடை இழந்தான்.
4. நான் ஈரோட்டில் எந்தக் கடைகளில் பள்ளி ப்ராஜெக்ட் ரெடிமேட் ஆகக் கிடைக்கும் என்று அறிந்துகொண்டேன்.
5. என் மனைவி, பெற்றோர் ஆசிரியர் மீட்டிங்கள் தந்த அனுபவத்தில், தன் தவறுகளையும், குறைகளையும் எப்படி மற்றவர்கள் மேல் சுமத்துவது என்பதைக் கற்றுக்கொண்டார்.

 இந்த வருடம் கோவை செல்வது என்ற முடிவெடுத்தபின், கோவையில் இதைவிடக் குறைந்த கட்டணம் உள்ள ஒரு பள்ளியில் ஏழாம் வகுப்புக்கு அட்மிசன் பெற்றுவிட்டேன். 
(இதில் என் பங்கு ஏதுமில்லை! என் மனைவி, ஆச்சர்யப்படத்தக்க வகையில் அவரது கல்லூரி நண்பர்கள் மூலம் -25 வருடங்களுக்குப்பின் - இதை சாதித்தார்!)

சரி,
இனி எழுத ஆரம்பித்த முதல் வரிக்கு வருவோம்!

இன்றைக்கு  மாதம் எவ்வளவு சம்பளம் வாங்கினாலும், இந்தப் பள்ளி, கல்லூரிக் கட்டணங்களுக்குக் கடன் வாங்காதவர்கள் யாரேனும்  உண்டா, இதைப் படிப்பவர்களில்?

மாதம் அரை லட்சம் சம்பளம் வாங்கும், வேறு பின்புலம் ஏதும் இல்லாத என் நண்பர் ஒருவர் என்னிடம் மிகவும் வருத்தப்பட்டார்.
தன் மகனை, தன் குடியிருப்பில் உள்ள அவன் தோழர்களைப்போல உயர்வான பள்ளியில் படிக்கவைக்கமுடியவில்லை. அது தன் மகனின் மனதில் ஒரு தாழ்வு மனப்பான்மையை உருவாக்கிவிட்டதாகவும், அதைப் போக்க முடியாமலும், அந்த உயர்பள்ளியில் படிக்கவைக்க கல்விக் கட்டணம் கட்டும் வசதியின்றித் தான் தூக்கமின்றித் தவிப்பதாகவும் கிட்டத்தட்ட ஒருமணி நேரம் புலம்பித் தள்ளிவிட்டார்.

இத்தனைக்கும் அவர் மகன் படிக்கும் பள்ளி ஆண்டுக் கட்டணம் இரண்டு லட்சத்துக்கு மேல். 
அப்போது மற்ற பள்ளிகளின் கட்டணங்களை நீங்களே யூகித்துக்கொள்ளுங்கள்!

சீருடை என்பதே மாணவர்களிடையே ஏற்றத்தாழ்வு மனப்பான்மை ஏற்படக்கூடாது என்று ஏற்படுத்தப்பட்டது!
இன்று  மாணவனின் சீருடை பார்த்தே, அவன் எந்தப்பள்ளி என்று உயர்வு தாழ்வு கண்டறிந்து பழகும் நிலைமை! 

இப்படி இளமையிலையே பிஞ்சு உள்ளங்களில் வேறுபாடுகளையும் ஏற்றத் தாழ்வுகளையும் உருவாக்கும் இந்த நச்சுக் கலாசாரத்தின் ஒரு அங்கமாக, நானும் இன்றுவரை இருப்பதுதான் நான் உணர்ந்த சமுதாயக் குற்றம்!

ஒரு மாணவனின் பள்ளிப்படிப்பை முடிப்பதற்குள், ( 14 வருடங்கள், சராசரியாக இரண்டரை லட்சம் என்ற கணக்கில்) ஏறத்தாழ முப்பத்தைந்து லட்சங்களை செலவழிக்கிறோம்.
அதன்பின் கல்லூரிகளில் கொட்டிக்கொடுப்பது தனி!

இதுபோக வருடம் தோறும்  எட்டாம் வகுப்புக்கு மேல் உள்ள பிள்ளைகளுக்கு, வெளிநாட்டுச் சுற்றுலா ஏறத்தாழ கட்டாயம் - ஒவ்வொரு வருடமும்.

கூடப் படிக்கும் மாணவர்கள் அனைவரும் செல்வதால், மகனின் திருப்திக்கு, வட்டிக்குப் பணம் வாங்கிச் சுற்றுலா அனுப்பிய பெற்றோர்கள் பலர்.

இந்த விரலுக்கு மீறிய வீக்கத்துக்குப் பெற்றோரைத் துரத்துவது எது?



இந்த மாய வலையை உடைத்துகல்விக்கூடங்களை அரசுடமை ஆக்க அரசை வலியுறுத்துவோம். 

திட்டமிட்டுப் படுகொலை செய்யப்பட்ட அரசுப்பள்ளிகளின் நிலையும், இந்த, படிப்பைத் தவிர பகட்டை சொல்லித்தரும் பள்ளிகளில் தங்கள் குழந்தைகளைப் படிக்க வைப்பதுதான் தங்களுக்குப் பெருமை என்ற போலி கௌரவ மனப்பான்மையை நடுத்தர, உயர்தட்டு மக்கள் மனதில் விதைத்த பிரச்சாரங்களும்தான்!

இது இன்று எல்லா மட்டங்களிலும் புரையோடிப் போய்விட்டது.
இதற்கு யாரை நோவது?

ஒரு சின்னக் கணக்கு!
LKG முதல் பத்தாம் வகுப்பு வரை ஒவ்வொரு வகுப்பிலும் நான்கு பிரிவுகள், அவற்றில் ஒவ்வொன்றிலும் நாற்பது மாணவர்கள் என்பது ஈரோட்டு சராசரி. அதன்பின் +2 வில் ஒவ்வொரு குரூப்பிலும் இரண்டு பிரிவிகள் என எட்டுப் பிரிவுகள், அதிலும் ஒவ்வொன்றிலும் நாற்பது மாணவர்கள்.
(12 x 4 x 40) + (2 x 4 x 2 x 40) = மொத்தம் 2560 மாணவர்கள்!

இதை 2000 என்று எடுத்துக்கொண்டு, சராசரி கட்டணம் ஒரு லட்சத்து ஐம்பதாயிரம் என்று எடுத்துக்கொண்டால், ஆண்டு வருமானம் 30 கோடி!

இந்தக் கணக்கில் நன்கொடைகள் மற்றும் விடுதிக் கட்டணங்கள் சேர்க்கப்படவில்லை!

இந்தப் பள்ளி ஆசிரியர்கள் பெரும் சம்பளம், அரசுப்பள்ளி ஆசிரியர்கள் பெறுவதில் ஐந்தில் ஒரு பங்கு இருந்தால் அதிகம்!

அரசுப்பள்ளிகளின் தரத்தை உயர்த்த  அரசுக்கு முடியாத காரியமல்ல! 

எலைட் சாராயக் கடைகளைத் திறக்கத் திட்டம் தீட்டும் அரசுக்கு, பள்ளிகளை எலைட் தரத்துக்கு உயர்த்தத் தெரியாதா
50% மாணவர்களுக்கு இலவசக்கல்வியை அரசு அளிக்கட்டும். மீதியுள்ள 50 % மாணவர்களிடம் நியாயமான கட்டணத்தை வசூலிக்கட்டும்.

அரசுப்பள்ளிகளின் கல்வித் தரத்தை கடுமையான சோதனைகளுக்கு உட்படுத்தி, தேர்ச்சி விகிதம் குறையும் பள்ளி ஆசிரியர்கள் மீது நடவடிக்கை எடுக்கட்டும்!

அரசு ஊழியர்களின் பிள்ளைகள் அரசுப் பள்ளிகளில் படிப்பதைக் கட்டாயமாக்கட்டும்.

இதன் முதல் கட்டமாக, அரசுப்பள்ளி மாணவர்களுக்கு மட்டும் அரசு மருத்துவ, இன்ஜினியரிங் தொழிற்கல்வி நிறுவனங்களில் இடம் அளிக்கட்டும்!

சாராயக்கடை நடத்திய எல்லோரும் இன்று கல்வி வள்ளல்கள் அவதாரம் எடுத்திருக்கும் நிலையில், கல்வி வள்ளல் ஆகும் அந்த அடிப்படைத் தகுதியும் நம் அரசாங்கத்துக்கு உண்டு!

இதற்கு ஒரு இயக்கத்தை முன்னெடுக்க நாம் முயலுவோம். 

கொஞ்சநாள் நடிகனுக்கும், அரசியல்வாதிக்கும் கொடி பிடிப்பதை விட்டு நாம் சந்தத்திக்காக நாம் சற்றே சிந்திப்போம்.

உங்கள் ஆக்கப்பூர்வமான விவாதங்களையும் ஆலோசனைகளையும் வேண்டி…..!





Wednesday, 13 May 2015

ஜெ விடுதலை - ஒரு குதர்க்க சிந்தனை!

இப்படி இருக்காது என்று தோன்றுகிறதா?



எனக்கென்னவோ, இவ்வளவு அனுபவம் வாய்ந்த ஒரு உயர் நீதிமன்ற நீதிபதி இப்படி ஓர் அப்பட்டமான  தவறைத் தெரியாமல் செய்திருப்பார் என்று தோன்றவில்லை!
அவர் தெரிந்தே இதைச் செய்தார் என்ற நோக்கில் சிந்திக்கையில் என் மனதுக்குப் பட்டதை உங்களுடன் பகிர்ந்துகொள்கிறேன்.

இது நிச்சயம் ஒரு குதர்க்கவாதமே!

ஆனால், நம் பண நாயகத்தில் எதுவும் சாத்தியம் என்பதால் இந்த யோசனை.

ஜெ விடுதலைக்கு சட்டப்பூர்வமாக ஏதும் வாய்ப்பு இல்லை என்பது குமாரசாமிக்கும் தெரிந்து, "எப்படியாவது" விடுதலை செய்ய நிர்பந்திக்கப் படுகிறார் என்று வைத்துக் கொள்வோம்.

(ஏற்கனவே, ஆச்சாரியா பா ஜ க அரசால் தனக்கு நேர்ந்த நிர்பந்தங்களை புத்தகமாகவே எழுதியிருக்கிறார்)

எனவே, இல்லாத, முடியாத, விடுதலைக்கு வாய்ப்பு, தவறுதலான விடுதலையே.

நாளை உச்ச நீதிமன்றம் இந்த அறியாமல் செய்யப்பட்ட பிழைக்கு, கண்டனம் மட்டுமே தெரிவிக்க முடியுமே ஒழிய, நீதிபதி குமாரசாமியை தண்டிக்க முடியாது. 
அந்த சமயத்தில் அவர் ஓய்வுபெற்று எங்காவது சந்தோஷமாக செட்டில் ஆகியிருப்பார்!

என் அறிவுக்குப் புரிந்தவரை, சட்டப்படி ஜெயலலிதா இப்போது விடுவிக்கப்பட்டுவிட்டார். 
இனி, கர்நாடக அரசு அப்பீலுக்குப் போவது என்று முடிவெடுத்து, அதை தொண்ணூறு நாட்களுக்குள் செய்யுமானாலும், ஜாமீன் கொடுத்த அதே விரைவில் அதை உச்ச நீதிமன்றம் அணுகும் என்று உறுதி சொல்லமுடியாது.

ஏற்கனவே லாலு உட்பட பல அப்பீல் மனுக்கள் நிலுவையில் உள்ளன.
எனவே,உச்ச நீதிமன்றம்  சிலவருடங்கள் தாமதப் படுத்துவதை சட்டப்படி யாரும் தடுக்க முடியாது.

கடைசியாக வந்த தீர்ப்பின்படி, ஜெயலலிதா, நிரபராதியாகவே வலம் வருவார். 

அவர் முதல்வராக எந்தத் தடையும் இல்லை.

இப்போது அவர் சட்டசபையைக் கலைத்து, பொதுத் தேர்தலுக்குக் கோரலாம்.

இந்த இடைப்பட்ட காலத்தில், 2G வழக்கை விரைந்து முடித்து, தேர்தல் அறிவிப்புக்குமுன், "தேவையான" தீர்ப்பை வெளியிடச் செய்வது ஒன்றும் மோடிமஸ்தான் அரசுக்கு முடியாத செயல் இல்லை.

ஏற்கனவே பல்வேறு குழப்பங்களால் பாதாளத்தில் இருக்கும் திமுகவை இதன்மூலம் தலை தூக்கவிடாமல் அடிக்கலாம்.

அந்தத் தேர்தலில் வெல்லும் அதிமுக இன்னொரு ஐந்து வருடங்களுக்கு ஆட்சியில் இருக்கும். 
ஜெ தலைமையிலோ, அல்லது ஏதாவது ஒரு அடிமை தலைமையிலோ!

உச்ச நீதிமன்ற தீர்ப்பு வருவதற்குள், தெனாலிராமன் சொன்ன குதிரையே பறக்கலாம்!

இதற்கு, சன்மானம், M.P.க்கள் கண்மூடித்தனமான ஆதரவும்
ஒரு கை விரல் எண்ணிக்கை அளவு MLA சீட்டும்!

மக்களுக்கு? 
இருக்கவே இருக்கிறது இலவச பீரோ கட்டில்!
காசா இல்லை சாராய முதலாளிகளிடம்?

இது சாத்தியம் இல்லை என்று படுகிறதா நண்பர்களே?



Friday, 8 May 2015

முப்பாலில் இருந்தும் முதல் நூறு!

140 என்ற எல்லைக்குள், குறளும் விளக்கமும்! முயன்றிருக்கிறேன்! தங்கள் விமர்சனங்கள் என்னை 1330க்கு ஊக்கப்படுத்தும்- நன்றி!!




30.1.2015 முதல் 

1.    செல்லச் சண்டைகள், அதனிலும், சண்டைக்குப் பின்னான கூடல், காதலில் பேரின்பம்! (ஊடுதல் காமத்துக்கின்பம், அதற்கின்பம் கூடி முயங்கப்பெறின்.-1330)

2.    எழுத்துக்கள் தொடங்குவது அகரத்தில், உலகம் தொடங்குவது அன்னை, தந்தை எனும் தெய்வத்தில்! (அகரமுதல எழுத்தெல்லாம் ஆதி பகவன் முதற்றே உலகு-1)

3.      நல்ல-படை,மக்கள்,செல்வம்,அமைச்சர், நட்பு,பாதுகாப்பு ஆறும் அமைந்த அரசன் ஆண் சிங்கம்! (படைகுடி கூழமைச்சு நட்பரண் ஆறும் உடையான் அரசரு ளேறு- 381)
  
4.    அழகியவள் ஊடல் கொள்ள, இரவு நீளட்டும் - ஊடல் தணிக்க நான் கெஞ்சிக்கொஞ்சும் இன்பம் நீடிக்க! (ஊடுக மன்னோ ஒளியிழை யாமிரப்ப நீடுக மன்னோ இரா-1329)

5.    தூய்மையான அறிவு வடிவான இறைவனடி பணிந்து தொழாவிடில், கற்ற கல்வியால் என்ன பயன்? (கற்றதனால் ஆய பயனென்கொல் வாலறிவன் நற்றாள் தொழாஅர் எனின் -2)
  
6.    அஞ்சாமை, கொடை, அறிவு, ஊக்கம்- நான்கும் குறைவின்றி இருப்பது அரசனின் பண்பு! (அஞ்சாமை ஈகை அறிவூக்கம் இந்நான்கும் எஞ்சாமை வேந்தற் கியல்பு-382)
7.    நெற்றி வியர்க்கப் பெற்ற கூடல் சுகத்தை, ஊடல் கொண்டு,அதிகமாய்ப் பெறுவோம்! (ஊடிப் பெறுகுவம் கொல்லோ நுதல்வெயர்ப்பக் கூடலில் தோன்றிய உப்பு-1328)

8.    விருப்பு வெறுப்பற்ற இறைவனடி பணிந்து நடப்போரைத் துன்பங்கள் நெருங்குவதில்லை (வேண்டுதல்வேண் டாமை இலானடி சேர்ந்தார்க்கு யாண்டும் இடும்பை இல-4)

9.    ஆட்சியாளருக்கு, காலம் தவறாமை, கல்வி, துணிச்சல் என மூன்று பண்புகளும் தேவை. (தூங்காமை கல்வி துணிவுடைமை அம்மூன்றும் நீங்கா நிலனாள் பவற்கு – 383)

10. தம் மனமெனும் மலரில் வாழும் இறைவன் திருவடி நினைப்பவர் இவ்வுலகில் நீடூழி வாழ்வர். (மலர்மிசை ஏகினான் மாணடி சேர்ந்தார் நிலமிசை நீடுவாழ் வார்-3)

11.  ஊடலில் தோற்றவரே வென்றவர் என்பது ஊடலின் பின் வரும் கூடலின்பத்தில் உணரப்படும். (ஊடலின் தோற்றவர் வென்றார் அதுமன்னும் கூடலிற் காணப்படும்- 1327)


12. உண்பதைவிட, முன்பு உண்டது செரித்தல் சுகம். காதலில் கூடிக்களிப்பதைவிட ஊடுவது இன்பம். (உணலினும் உண்ட தறலினிது காமம் புணர்தலும் ஊடல் இனிது-1326)

13. அறநெறி தவறாது, தவறுகள் நீக்கி, வீரத்தோடு மானமும் பெரிதெனக் கொண்டவனே நல்ல அரசன். (அறனிழுக்கா தல்லவை நீக்கி மறனிழுக்கா மான முடைய தரசு-384)

14. இறைவனின் மெய்ப்புகழ் நாடுவோரை நன்மை தீமை இரு வினைகளும் பாதிக்காது. (இருள்சேர் இருவினையும் சேரா இறைவன் பொருள் சேர் புகழ்புரிந்தார் மாட்டு-5)
15. நிதிஆதாரம் வகுத்து, வந்ததைக் காத்து, மக்கள் மேன்மைக்கு செலவிடல் அரசுக்கு அழகு. (இயற்றலும் ஈட்டலுங் காத்தலுங் காத்த வகுத்தலும் வல்ல தரசு-385)
16.  தன்மீது தவறின்றியும் காதலியின் ஊடலால் அவளை நீங்கியிருத்தல் ஒரு இன்பம். (தவறிலர் ஆயினும் தாம்வீழ்வார் மென்றோள் அகறலின் ஆங்கொன் றுடைத்து-1325)
17. ஐம்புலன் அடக்கி, பொய்யில்லா ஒழுக்கத்தோடு வாழ்பவர் நீண்ட புகழ் அடைவர். (பொறிவாயில் ஐந்தவித்தான் பொய்தீர் ஒழுக்க நெறிநின்றார் நீடுவாழ் வார்-6)
18. காட்சிக்கு எளிமையும் கடுஞ்சொல் கூறாமையும் கொண்ட அரசனின்ஆட்சி விரிவடையும். (காட்சி கெளியன் கடுஞ்சொல்லன் அல்லனேன் மீக்கூறும் மன்னன் நிலம்-386)
19. இறுகத் தழுவி விலகாதிருக்கவும், அதனால் என் உள்ள உறுதி உடைபடவும் ஊடலே காரணம். (புல்லி விடாஅப் புலவியுள் தோன்றுமென் உள்ளம் உடைக்கும் படை-1324)
20. இணையில்லா இறைவன் திருவடி பற்றுவோர் தவிர, பிறர் தம் மனக்கவலை தீராது. (தனக்குவமை இல்லாதான் தாள்சேர்ந்தார்க் கல்லால் மனக்கவலை மாற்றல் அரிது-7)
21. இன்சொல்லுடன் பொருள் தந்து குடிகளைக் காக்கும் அரசுக்கு உலகே வசமாகும் (இன்சொலால் ஈத்தளிக்க வல்லாற்குத் தன்சொலால் தான்கண் டனைத்திவ் வுலகு-387)
22. நிலம் கலந்த நீர்போல் மனம் கலந்தவருடன் ஊடல்கொள்வதைவிட சொர்க்கம் இல்லை. (புலத்தலிற் புத்தேள்நா டுண்டோ நிலத்தொடு நீரியைந் தன்னார் அகத்து-1323)
23. அறக்கடலாகிய இறைவன் திருவடி சேராத மற்றோர் பிறவிக்கடலைக் கடத்தல் கடினம். (அறவாழி அந்தணன் தாள்சேர்ந்தார்க் கல்லால் பிறவாழி நீந்தல் அரிது-8)
24. நீதி வழுவாது குடிகளைக்காக்கும் அரசன் மக்களால் இறையெனப் போற்றப்படுவான். (முறைசெய்து காப்பாற்றும் மன்னவன் மக்கட் கிறையென்று வைக்கப் படும்-388)

25. காதலர் அன்பு சற்று வாடக் காரணமாயினும் ஊடல் தரும் சிறு துன்பம் பெருமைக்குரியது. (ஊடலின் தோன்றும் சிறுதுனி நல்லளி வாடினும் பாடு பெறும்-1322)

26. இறைவன் திருவடி வணங்காத தலைகள் இயங்காத ஐம்புலன்போல் உடலோடு இருந்தும் பயனற்றவை (கோளில் பொறியின் குணமிலவே எண்குணத்தான் தாளை வணங்காத் தலை-9)

27. குறைகள் சொல்பவர் நியாயமும் மதித்து நடக்கும் அரசனை, உலகமே பணியும். (செவிகைப்பச் சொற்பொறுக்கும் பண்புடை வேந்தன் கவிகைக்கீழ்த் தங்கு முலகு-389)

28.  காதலர்மீது தவறில்லா நிலையிலும் ஊடல்கொள்வது, செல்லமாய் அவர் நேசம் வளர்க்கும் வழி. (இல்லை தவறவர்க் காயினும் ஊடுதல் வல்ல தவரளிக்கும் ஆறு-1321)
29. இறைவன் திருவடி பற்றுவோர் பிறவிக்கடலைக் கடப்பர். மற்றோர் அதில் மூழ்கி உழல்வர். (பிறவிப் பெருங்கடல் நீந்துவர் நீந்தார் இறைவன் அடிசேரா தார்-10)
30. கொடை, அருள், நெறியாட்சி, குடிகளைக் காத்தல் உள்ள அரசு ஒளியுற்றுவிளங்கும் (கொடையளி செங்கோல் குடியோம்பல் நான்கும் உடையானாம் வேந்தர்க் கொளி-390)
31. இமைக்காது அவளை ரசித்தாலும், எவளை ஒப்பிட்டாயென சினம் கொள்வாள். (நினைத்திருந்து நோக்கினும் காயும் அனைத்துநீர் யாருள்ளி நோக்கினீர் என்று-1320)
32. உலகம் வாழ்வதே பருவத்தில் பொழியும் மழையால்.எனவே, மழை அமுதமெனப் போற்றப்படுகிறது. வானின் றுலகம் வழங்கி வருதலால் தானமிழ்தம் என்றுணரற் பாற்று-11
33. கற்பதைப் பிழையின்றிக்கற்று, அந்த நெறிப்படி நல்வாழ்வு வாழவேண்டும். (கற்க கசடறக் கற்பவை கற்றபின் நிற்க அதற்குத் தக- 391.)
34. ஊடலின்போது பணிந்து கொஞ்ச,எவளிடமும் நீ இப்படித்தானோ என கோபம்கொள்வாள். (தன்னை உணர்த்தினும் காயும் பிறர்க்கும்நீர் இந்நீரர் ஆகுதிர் என்று-1319)
35. உணவை விளைவிக்க உதவுவது மட்டுமன்றி, தானே உணவாகவும் விளங்குவது மழை. (துப்பார்க்குத் துப்பாய துப்பாக்கித் துப்பார்க்குத் துப்பாய தூஉ மழை-12)
36. எண்ணும் எழுத்துமான கல்வியறிவு வாழும் மனிதருக்கு இரு கண்களைப் போன்றது. (எண்ணென்ப ஏனை யெழுத்தென்ப இவ்விரண்டுங் கண்ணென்ப வாழும் உயிர்க்கு-392)
37. தும்மலை அடக்கக்கண்டு, எவள் நினைத்ததை என்னிடம் மறைத்தாய் என ஊடலில் அழுதாள். (தும்முச் செறுப்ப அழுதாள் நுமருள்ளல் எம்மை மறைத்தீரோ என்று-1318)
38. கடல்நீர் சூழ இருந்தாலும், மழை பொய்த்தால் உயிர்கள் பசியில் வாடும். (விண்இன்று பொய்ப்பின் விரிநீர் வியனுலகத்து உள்நின் றுடற்றும் பசி-13)
39. கற்றவரே கண்ணுடையார். கல்லாதோருக்கு அறிவு நோக்கு இல்லா இருகண்களும் புண். (கண்ணுடைய ரென்பவர் கற்றோர் முகத்திரண்டு புண்ணுடையர் கல்லா தவர்-393)
40. நான் தும்ம,தானே வாழ்த்தி, உடனே,யார் நினைக்கத் தும்மினாயென அழுதாள். (வழுத்தினாள் தும்மினேன் ஆக அழித்தழுதாள் யாருள்ளித் தும்மினீர் என்று-1317)
41. வாரி வழங்கும் மழை வளம் குன்றினால் உழவர்கள் ஏர் பூட்டி உழுது பயன் ஏதுமில்லை. (ஏரின் உழாஅர் உழவர் புயல்என்னும் வாரி வளங்குன்றிக் கால்-14)
42. மகிழ்வாய்ப் பழகி, பிரிகையில் அதை எண்ணித் துயருறும்படி நடத்தல் அறிஞர்க்கு அழகு. (உவப்பத் தலைக்கூடி உள்ளப் பிரிதல் அனைத்தே புலவர் தொழில்-394)
43. உன்னை நினைத்தேன் என,இடையே மறந்து, இன்று நினைத்தாயா? என ஊடினாள். (உள்ளினேன் என்றேன்மற் றென்மறந்தீர் என்றென்னைப் புல்லாள் புறத்தக் அகன்ற-1316)
44. கெடுப்பதும், வளம்குன்றிக் கெட்டவருக்குப் பெய்து கொடுப்பதும் மழை. (கெடுப்பதூஉம் கெட்டார்க்குச் சார்வாய்மற் றாங்கே எடுப்பதூஉம் எல்லாம் மழை-15)
45. செல்வர்முன் ஏழைபோல், ஆசானைப் பணிந்து கற்பவர் உயர்ந்தோர் மற்றோர் இழிந்தோர் (உடையார்முன் இல்லார்போல் ஏக்கற்றுங் கற்றார் கடையரே கல்லா தவர்-395)
46. இப்பிறவியில் பிரியமாட்டோமென,ஆயின்,வரும்பிறவியில் பிரிவோமோ என்றழுதாள் காதலி (இம்மைப் பிறப்பில் பிரியலம் என்றேனாக் கண்நிறை நீர்கொண் டனள்-1315)
47. வான்மழை வீழாதுபோனால், புவியில் பசும் புல்லும் துளிர்க்கக் காணமுடியாது. (விசும்பின் துளிவீழின் அல்லால்மற் றாங்கே பசும்புல் தலைகாண் பரிது-16)
48. மணலில் தோண்டிய அளவு நீர் ஊறுவதுபோல் கல்வி கற்கும் அளவுக்கு அறிவு பெருகும். (தொட்டனைத் தூறு மணற்கேணி மாந்தர்க்குக் கற்றனைத் தூறும் அறிவு-396)
49. யாரைவிடவும் உன்னைக் காதலிக்கறேன் எனக்கொஞ்ச,யாரைவிட என்றது யாரை என்று ஊடினாள். (யாரினுங் காதலம் என்றேனா ஊடினாள் யாரினும் யாரினும் என்று-1314)
50. கடல்நீர் மேகமாகி மீண்டும் மழையாகப் பெய்யாவிடில் கடலும் வற்றிப்போகும். (நெடுங்கடலும் தன்நீர்மை குன்றும் தடிந்தெழிலி தான்நல்கா தாகி விடின்-17)
51. எங்கு சென்றாலும் சிறக்கவைக்கும் கல்வியை சாகும்வரை கல்லாதவரை என்ன சொல்ல? (யாதானும் நாடாமால் ஊராமால் என்னொருவன் சாந்துணையுங் கல்லாத வாறு-397)

52. கொடிமலரை அழகாய்ச் சூட்டிவர, எவளுக்குக் காட்டச் சூடினாய் என்று ஊடினாள் (கோட்டுப்பூச் சூடினும் காயும் ஒருத்தியைக் காட்டிய சூடினீர் என்று-1313)

53. வானம் பொய்க்குமானால், வானுறையும் தெய்வத்துக்கே, பூஜை ஏது?திருவிழாதான் ஏது? (சிறப்பொடு பூசனை செல்லாது வானம் வறக்குமேல் வானோர்க்கும் ஈண்டு-18)

54. ஒருவன் ஒரு பிறப்பில் கற்ற கல்வி, அவன் ஏழு பிறவிக்கும் உதவத் துணையாய் வரும். (ஒருமைக்கண் தான்கற்ற கல்வி ஒருவற் கெழுமையும் ஏமாப் புடைத்து-398)

55. ஊடலின்போது, நீடூழிவாழ வாழ்த்துவேன் என்று பொய்யாய்த் தும்மினான் காதலன். (ஊடி இருந்தேமாத் தும்மினார் யார்தம்மை நீடுவாழ் கென்பாக் கறிந்து-1312)

56.  மழை பெய்யாவிடில் உலகில் பிறர்க்கான தானமும், தனக்கான தவமும் lகெட்டுப்போகும். (தானம் தவமிரண்டும் தங்கா வியனுலகம் வானம் வழங்கா தெனின்-19)
57. தான் இன்புற்ற கல்வி உலகை இன்புறுத்தக் கண்டு அறிஞர்,மேலும் கல்வியை விரும்புவர். (தாமின் புறுவ துலகின் புறக்கண்டு காமுறுவர் கற்றறிந் தார்-399)
58. எல்லாப்பெண்ணும் காமக்கண்ணால் உண்ட மார்பை பாவை நான் தழுவமாட்டேன். (பெண்ணியலார் எல்லாரும் கண்ணிற்கு பொதுவுண்பர் நண்ணேன் பரத்தநின் மார்பு-1311)
59. மழை நீரின்றிப் போனால் உலகில் வாழமுடியாமல் ஒழுக்கமும் கூடக் குறைந்துபோகும். (நீரின் றமையா துலகெனின் யார்யார்க்கும் வானின் றமையா தொழுக்கு-20)
60. கல்வியைப்போல் அழிவற்ற செல்வம் உலகில் வேறு எதுவுமில்லை. (கேடில் விழுச்செல்வங் கல்வி யொருவற்கு மாடல்ல மற்றை யவை-400)
61. ஊடல் தணிக்காது என்னை வாடவிடுபவனை நெஞ்சம் கூடத்துடிப்பதற்கு அவன்மீதான ஆசையே காரணம். (ஊடல் உணங்க விடுவாரோ டென்னெஞ்சம் கூடுவேம் என்ப தவா-1310)
62. ஒழுக்கத்தில் உயர்ந்த பற்றற்வர்கள் பெருமையை உயர்ந்தவை என்று நூல்கள் கூறும் (ஒழுக்கத்து நீத்தார் பெருமை விழுப்பத்து வேண்டும் பனுவல் துணிவு-21)
63. நல்ல நூலறிவின்றிக் கற்றவர்சபையில் பேசுவது, கட்டம் வரையாது தாயம் ஆடுதல்போல. (அரங்கின்றி வட்டாடி யற்றே நிரம்பிய நூலின்றிக் கோட்டி கொளல்-401)
64. நிழலில் இருக்கும் நீர்போல் குளிர்ச்சியும் இனிமையுமானது அன்புள்ளவரிடம் கொள்ளும் ஊடல். (நீரும் நிழல தினிதே புலவியும் வீழுநர் கண்ணே இனிது-1309)
65. பற்றற்றவர் பெருமை எண்ணில் அளப்பது,உலகில் இறந்தவரை எண்ணமுயல்வதற்குசமம். (துறந்தார் பெருமை துணைக்கூறின் வையத்து இறந்தாரை எண்ணிக்கொண் டற்று-22)
66. கல்லாதவர் உரையை விரும்புவது, மார்பில்லாப் பெண் மேல் ஆசைப்படுவதுபோல. (கல்லாதான் சொற்கா முறுதன் முலையிரண்டும் இல்லாதாள் பெண்காமுற் றற்று-402)
67. தமக்காக நாம் வருந்துவதை அறிகின்ற காதலர் இல்லாமல் வீணில் வருந்துவதால் என்ன பயன்? (நோதல் எவன்மற்று நொந்தாரென் றஃதறியும் காதலர் இல்லா வழி-1308)
68. நன்மை தீமை இரண்டும் ஆய்ந்தறிந்து நல்லறம்புரிபவர் பெருமை இந்த உலகில் உயர்ந்தது. (இருமை வகைதெரிந் தீண்டறம் பூண்டார் பெருமை பிறங்கிற் றுலகு-23)
69. கற்றவர்முன் வாய்மூடி அமைதியாயிருந்தாலே கல்லாதவரும் நல்லவரென மதிக்கப்படுவர். (கல்லா தவரும் நனிநல்லர் கற்றார்முன் சொல்லா திருக்கப் பெறின்-403)
70. கூடல் இன்பம் அதிகநேரம் நீடிக்காதோ என்ற ஏக்கம், ஊடலைவிடவும் துன்பம் தருவது. (ஊடலின் உண்டாங்கோர் துன்பம் புணர்வது நீடுவ தன்றுகொல் என்று-1307)
71. அறிவென்ற ஆயுதத்தால் ஐம்புலனும் அடக்குபவன், துறவுக்கு விதையாவான் (உரனென்னுந் தோட்டியான் ஓரைந்தும் காப்பான் வரனென்னும் வைப்பிற்கோர் வித்து-24)
72. கல்லாதவன் அறிவாளியாய் இருந்தாலும் அவனைக் கல்வியில் சிறந்தவனாய் ஏற்கமாட்டார்கள் (கல்லாதான் ஒட்பங் கழியநன் றாயினுங் கொள்ளார் அறிவுடை யார்-404)
73. ஊடலும் செல்லக்கோபமும் இல்லாத காமம் அழுகிய பழமும், பிஞ்சும்போல் பயனற்றது (துனியும் புலவியும் இல்லாயின் காமம் கனியும் கருக்காயும் அற்று-1306)
74. ஐம்புலன் அடக்கி ஆள்பவர்தம் வல்லமைக்கு வானோர் தலைவன் இந்திரனே சான்றாவான் ஐந்தவித்தான் ஆற்றல் அகல்விசும்பு ளார்கோமான் இந்திரனே சாலுங் கரி-25)
75. கல்லாதவன் போடும் தற்புகழ்ச்சி வேடமெல்லாம் கற்றவர்முன் பேசும்போது கலைந்துபோகும். கல்லா ஒருவன் தகைமை தலைப்பெய்து சொல்லாடச் சோர்வு படும்-405)
76. மலர்விழி மங்கையர் கொள்ளும் அன்பு கலந்த ஊடல், காதல் கொண்ட பண்புள்ள ஆணுக்கு அழகு (நலத்தகை நல்லவர்க் கேஎர் புலத்தகை பூவன்ன கண்ணார் அகத்து-1305)
77. அரிதான செயல்களைச் செய்துமுடிப்பவரே உயர்ந்தவர்.அதை முயலாதவர் என்றும் சிறியவரே. (செயற்கரிய செய்வார் பெரியர் சிறியர் செயற்கரிய செய்கலா தார்-26)
78. கல்லாதவர்கள் ஏதும் விளையாத களர்நிலம் போல, உயிரற்ற நடைப்பிணம் போன்றவர்கள். (உளரென்னும் மாத்திரைய ரல்லால் பயவாக் களரனையர் கல்லா தவர்-406)
79. ஊடல் கொண்டவர்மீது அன்பு காட்டாதிருப்பது, ஏற்கனவே வாடிய கொடியை வேரோடு அறுப்பதுபோலாகும். (ஊடி யவரை உணராமை வாடியற்ற வள்ளி முதலரிந் தற்று-1304)
80. ஐம்புலன்களின் ஆற்றலைப் புரிந்து, அவற்றை அடக்கி ஆள்பவனுக்கு இந்த உலகமே வசமாகும் (சுவையொளி ஊறோசை நாற்றமென் றைந்தின் வகைதெரிவான் கட்கே உலகு-27)
81. நுட்பமான நூலறிவற்றவன் அழகும் வளர்ச்சியும் மண்ணால் செய்த பொம்மை போன்றதேயாகும். (நுண்மான் நுழைபுல மில்லான் எழினலம் மண்மாண் புனைபாவை யற்று-407)
82. ஊடல்கொண்டவரைக் கொஞ்சிக் கூடாமல் விடுவது அவர் துன்பத்தை அதிகரிக்கும். (அலந்தாரை அல்லல்நோய் செய்தற்றால் தம்மைப் புலந்தாரைப் புல்லா விடல்-1303)
83. மொழிவன்மை உடைய சான்றோர்கள் பெருமையை, உலகில் நிலைத்திருக்கும் அவர் மறைமொழி காட்டும் நிறைமொழி மாந்தர் பெருமை நிலத்து மறைமொழி காட்டி விடும்-28)
84. மூடர்களிடம் சேரும் செல்வம், நல்லவரை வாட்டி வதைக்கும் வறுமையினும் மிகக் கொடியது. (நல்லார்கண் பட்ட வறுமையின் இன்னாதே கல்லார்கண் பட்ட திரு-408)
85. உணவில் உப்புபோல ஊடல் அளவோடிருக்கவேண்டும். மிகுதியானால் கூடல் இன்பம் ருசிக்காது (உப்பமைந் தற்றால் புலவி அதுசிறிது மிக்கற்றால் நீள விடல்-1302)\
86. நல்ல குணம்என்ற மலையேறி நிற்கும் உயர்ந்தவர் கொண்ட கோபம் நீண்டநேரம் இருக்காது (குணமென்னுங் குன்றேறி நின்றார் வெகுளி கணமேயுங் காத்தல் அரிது-29)
87. கற்பதறால் வரும் உயர்வு, பிறப்பாலான உயர்வு தாழ்வை அழித்துவிடும். (மேற்பிறந்தா ராயினுங் கல்லாதார் கீழ்ப்பிறந்துங் கற்றா ரனைத்திலர் பாடு-409)
88. ஊடலால் அவனடையும் வேதனையை ரசித்துப்பார்க்கக் கொஞ்சநேரம் தழுவாமல் தவிக்கவிடு. (புல்லா திராஅப் புலத்தை அவருறும் அல்லல்நோய் காண்கம் சிறிது-1301)
89. எல்லா உயிர்களிடத்தும் சம அன்பும் கருணையும் கொண்டவரே அந்தணர் ஆவார். (அந்தணர் என்போர் அறவோர்மற் றெவ்வுயிர்க்கும் செந்தண்மை பூண்டொழுக லான்-30)
90. நூலறிவு பெற்றவருக்கும், பெறாதவருக்குமான வேறுபாடு, மனிதனுக்கும் விலங்குக்குமானதுபோல. (விலங்கொடு மக்க ளனையர் இலங்குநூல் கற்றாரோ டேனை யவர்-410)
91. நம்முடைய நெஞ்சே நமக்கு உறவாயில்லாதபோது, மற்றவர் நம்மிடம் விலகியிருப்பது எளிதுதானே? (தஞ்சம் தமரல்லர் ஏதிலார் தாமுடைய நெஞ்சம் தமரல் வழி-1300)
92. சிறப்பும் செல்வமும் தரும் நல்லறத்தைவிட உயிர்களுக்கு வேறெது நன்மை தரும்? (சிறப்பீனும் செல்வமும் ஈனும் அறத்தினூஉங்கு ஆக்கம் எவனோ உயிர்க்கு-31)
93. கேள்வியறிவு என்ற செல்வமே எல்லாச் செல்வங்களையும் விடச் சிறந்ததாகும் (செல்வத்துட் செல்வஞ் செவிச்செல்வம் அச்செல்வஞ் செல்வத்து ளெல்லாந் தலை-411)
94. துன்பம் வருகையில் தன் நெஞ்சே துணை நில்லாவிடில் வேறு யார் துணையாக நிட்பார்? (துன்பத்திற் குயாரோ துணையாவார் தாமுடைய நெஞ்சந் துணையல் வழி-1299)
95. அறம் செய்வதுபோல் நன்மையுமில்லை, அறம் செய்யாது விடுவதுபோல் ஒரு தீமையுமில்லை (அறத்தினூஉங் காக்கமும் இல்லை அதனை மறத்தலின் ஊங்கில்லை கேடு-32)
96. செவிக்கு உணவான நல்ல விஷயங்கள் கிடைக்காதபோது வயிற்றுக்கும் சிறிது உணவிடப்படும் (செவிக்குண வில்லாத போழ்து சிறிது வயிற்றுக்கும் ஈயப் படும்-412)
97. ஊடலில் காதலனை இகழ்வது தனக்கே இழிவென அவனைப் புகழ்ந்து உருகும் என் நெஞ்சம் (எள்ளின் இளிவாமென் றெண்ணி அவர்திறம் உள்ளும் உயிர்க்காதல் நெஞ்சு-1298)
98. எங்கு சென்றாலும் அங்கெல்லாம் அறவழி வாழ்வதே மிகச்சிறந்த வாழ்க்கை முறையாகும். (ஒல்லும் வகையான அறவினை ஓவாதே செல்லும்வாய் எல்லாஞ் செயல்-33)
99. செவியுணவான கேள்விச்செல்வம் நிரம்பியவர் அவியுண்டு வாழும் தேவருக்கு சமம். (செவியுணவிற் கேள்வி யுடையார் அவியுணவின் ஆன்றாரோ டொப்பர் நிலத்து-413)
100.      அவனை மறக்க முடியாமல் தேடியலையும் என் நெஞ்சும் நானும் நாணத்தை மறந்துவிட்டோம். (நாணும் மறந்தேன் அவர்மறக் கல்லாவென் மாணா மடநெஞ்சிற் பட்டு-1297)
101.